سانحہ مچھ کے مقتولین کی تدفین، عمران خان کی کوئٹہ میں لواحقین سے ملاقات

بلوچستان کے علاقے مچھ میں شدت پسندوں کے حملے میں ہلاک ہونے والے دس کان کنوں کی ہزارہ ٹاؤن قبرستان میں تدفین کر دی گئی ہے جب کہ وزیراعظم عمران خان نے کوئٹہ میں ہزارہ برادری کے مقتولین کے لواحقین اور کمیونٹی کے افراد سے ملاقات کی۔

وزیراعظم نے لواحقین کے ساتھ ملاقات کے دوران کہا کہ ’ شہدا کے لواحقین کے دکھ میں مجھ سمیت پورا پاکستان شامل ہے۔ مجھے خوشی ہے کہ آپ نے بات مانی اور جانبحق ہونے والوں کو دفنا دیا۔ ہم سب آپ کے ساتھ کھڑے ہیں۔‘

ان کا کہنا تھا کہ ’ہم اپنے بچوں اور بہنوں کا خیال رکھیں گے۔ تمام مطالبات مان لیے گئے۔ ہم نے شہدا کے لواحقین سے جو وعدے کیے ہیں وہ پورے کریں گے۔‘

وزیراعظم عمران خان نے کہا کہ ’ہزارہ کمیونٹی کے ساتھ بڑے سانحے پیش آئے ہیں۔ ہزارہ برادری کے پاس پہلے بھی آچکا ہوں۔ جب دہشت گردی زیادہ تھی اورلوگ آنے سے گھبراتے تھےمیں اس وقت بھی آیا ہوں۔‘